ގަދަކަމުން އަނބިމީހާއަށް ކުޑަވެސް އަނިޔާއެއް ވާގޮތަށް ޖިންސީ ގުޅުން ހިންގުމަކީ ޙަރާމް ކަމެއް: ޝެއިޚް ޒައިދު
ގަދަކަމުން އަނބިމީހާ އަށް ކުޑަވެސް އަނިޔާއެއްވާ ގޮތަށް ޖިންސީ ގުޅުން ހިންގުމަކީ ޙަރާމް ކަމެއް ކަމުގައި މަޝްހޫރު ދީނީ ޢިލްމުވެރިޔާ ޝެއިޚް ޢަލީ ޒައިދު ވިދާޅުވެއްޖެއެވެ.
ޝެއިޚް ޒައިދު މިހެން ވިދާޅުވެފައިވަނީ އަނބިމީހާ ރޭޕް ކުރުމުގެ ކުށުގައި ގދ. ތިނަދޫ ޖަވާހިރުމާގެ ދެކުނު، އިބްރާހިމް ޝާހު ތިން އަހަރަށް ޖަލަށްލާން ހައި ކޯޓުން މިއަދު ހުކުމް ކޮށްފައިވާ ދަނޑިވަޅެއްގައެވެ.
ޝާހު އަށް އެހުކުމް އިއްވުމާއެކު، "ފިރިއަކު އޭނާގެ އަނބިމީހާ އާއެކު ހިންގާ އެެއްވެސް ބާވަތެއްގެ ޖިންސީ ގުޅުމަކީ ރޭޕް އެއް ނޫން ކަމަށް" ބައެއް ދީނީ ޢިލްމުވެރިން ވިދާޅުވިކަމަށް ބުނެ ބައެއް ފަރާތްތަކުން ވަނީ ޢިލްމުވެރިންނަށް ފާޑު ވިދާޅުވެފައެވެ.
ޝެއިޚް ޒައިދު މިރޭ ކުރެއްވި ޓްވީޓެއްގައި ވިދާޅުވެފައިވަނީ އެބޭފުޅުން އަބަދުވެސް ވިދާޅުވެފައިވާނީ ގަދަކަމުން އަނބިމީހާއަށް ކުޑަވެސް އަނިޔާއެއްވާ ގޮތަށް ޖިންސީ ގުޅުން ހިންގުމަކީ ޙަރާމް ކަމެއް ކަމުގައެވެ.
"ހަމައެފަދައިން އަނބިމީހާ ވެސް ފިރިމީހާ ވެސް އެކަކު އަނެކަކަށް އިހްތިރާމްކޮށް އުޒުރަކާއި ލައިގެން މެނުވީ އެކަމުން މަނާވެ ނުގަތުމަށް" ޝެއިޚް ވިދާޅުވެފައިވެއެވެ.
