ސެލެބްރިޓީން ދާ ތަންތަން ޕަޕަރާޒީންނަށް މާކުރިން އެނގެނީ ކިހިނެއްބާ؟
ޢާއްމުކޮށް ވަރަށް ގިނައިން ވާ ކަމެކެވެ. މަޝްހޫރު މީހެއްގެ ޚަބަރެއް ލިޔެލަން ބަލާއިރު ފެންނަނީ އެވެނި މީހަކު މިވެނި ތަނަކަށް މިއަދު ގޮސްފިއޭ، މިވެނި މީހަކު އެވެނި މީހަކާއެކު މިއަދު އެއާޕޯޓުން ފެނިއްޖޭ، ނުވަތަ މިވެނި އެވެނި ބަޔަކު އެވެނި މިވެނި ތާކަށް ދަނިކޮށް މަގުމަތިން ފެނިއްޖޭ މިފަދަ ޚަބަރު ތަކެކެވެ. ޚާއްސަކޮށް މިފަދަ ޚަބަރުތަށް ގިނައިން ފެންނަނީ ހޮލީވުޑާއި ބޮލީވުޑުގެ ސެލެބްރިޓީންނާ ބެހޭ ގޮތުންނެވެ.
މިފަދަ ޚަބަރުތަށް ފެނުމުން ވަރަށް ގިނައިން ހިތަށް އަރާ ސުވާލެކެވެ. އެފަންނާނުން އެތަންތަނަށް ދާކަން ރިޕޯޓަރުންނަށް ނުވަތަ ފޮޓޯ ނެގުމައިގެން އުޅޭ "ޕަޕަރާޒީންނަށް" އެހާ ފަސޭހައިން އެނގެނީ ކިހިނެއްބާއެވެ. އެމީހުން އަބަދުވެސް ފަންނާނުންނަށް ފާރަލަނީބާއޭ، ފަންނާނުން ފެނޭތޯ އެކި ތަންތަނުގައާއި ފަންނާނުންގެ ގޭގޭގެ ކުރިމަތީގައި ވެސް މުގޯލި އަޅައިގެން ތިބެނީ ބާއޭ ހިތަށް އެރިއެވެ.
އެހެންކަމުން ކުޑަ ރިސާޗެއް ހެދީމެވެ. އެގޮތުން އެނގުނު އެއްޗަކީ، ބައެއް ޕަޕަރާޒީން ހަމަ އަސްލުވެސް ބައެއް ފަންނާނުންނަށް ފާރަލާ ކަމެވެ. ރިޕޯޓުތަކުން ބުނާ ގޮތުގައި އެފަދަ ޕަޕަރާޒީން އެންމެ ފުރަތަމަ އެމީހަކީ ކާކުކަށް ނޭނގޭ ގޮތަށް ފަންނާނުންނަށް ފާރަލަމުން ގެންދެއެވެ. އެގޮތުން އެފަންނާނެއްގެ ކޮންމެ ދުވަހެއްގެ ރޫޓިން އޮންނަ ގޮތް ވެސް ބައެއް މީހުންނަށް މާކުރިން ވަނީ އެނގިފައެވެ. ކެމެރާތައް ހިފައިގެން ފޮޓޯ ނެގުމާއި އެކުވެރި އެހެން ފޮޓޯގްރާފަރުންނަށް ގުޅައިގެން ގެންނަން ވެސް ގެނެއެވެ. މިއި ފަންނާނުން ބައެއް ފަހަރު ވަރަށް ބިރުވެސް ގަންނަ ކަމެކެވެ. ބައެއް ފަހަރު އެހެންވެ އެމީހުން ވެސް ތަނަކަށް ދާން ބޭނުންނަމަ މޫނު ނިވާކޮށްގެން، ނުވަތަ ކާކުކަން ނޭނގޭ ގޮތަށް ފިލައިގެން ތަންތަނަށް ދެއެވެ. މިހެން ބައެއް ޕަޕަރާޒީން އުޅޭ، ފަންނާނުންނަށް މިނިވަން ކަމެއް ނުދޭތީ، ބައެއް ފަންނާނުން ރުޅި އައިސްގެން އެމީހުންނާ ދި،މާލަށް އެއްޗެހި ގޮވައެވެ. އަދި ބައެއް މީހުން އެފަދަ މީހުންނާ ދެކޮޅަށް މައްސަލަ ވެސް ހުށަހަޅައެވެ.
ރިޕޯޓުތަކުން ބުނާ ގޮތުގައި އަނެއްބައި ފަންނާނުން، އެމީހުންދާ ތަންތަނަށް ޕަޕަރާޒީން ގެންދަނީ އަމިއްލައަށް އެމީހުންނަށް ގުޅައިގެންނެވެ. ޕަބްލިސިޓީ ނުވަތަ މަޝްހޫރުކަން ބޭނުން ވެގެން އެފަދަ ފަންނާނުން އެމީހުން ދަންނަ ދެތިން ޕަޕަރާޒީންނަކަށް ގުޅާ، އެވެނި މިވެނި ތަނަކަށް ދާން އުޅޭ ކަމަށް ބުނެއެވެ. ބައެއް ފަހަރު އަގަށް ވެސް އެމީހުން މިކަންކަން ކުރެއެވެ. މަޤްސަދަކީ ނުވަތަ ބޭނުމަކީ އެންމެ ކަމެކެވެ. މަޝްހޫރުވުމެވެ.
ކޮންމެއަކަސް، މިފަދަ މަންޒަރެއް އަޅުގަނޑުމެންގެ ރާއްޖޭގެ ފިލްމު އިންޑަސްޓްރީގައެއް ނުވަތަ މުނިފޫހިފިލުވުމުގެ ދާއިރާއަކު ނުހިނގައެވެ.
Ads by STO
