ގާސިމް ރިސޯޓުގައި މަޑުކުރެއްވީ، އެންމެ ހެޔޮ ގޮތަކީ އެ ހުރި ތަނެއްގައި ދެމިހުރުން ކަމަށް ގަބޫލުފުޅު ކުރައްވާތީ: ޖޭޕީ

ޖުމްހޫރީ ޕާޓީގެ ލީޑަރު ގާސިމް އިބްރާހިމް ރިސޯޓުގައި މަޑު ކުރެއްވީ، ކޮވިޑްގެ ޙާލަތުގައި އެންމެންނަށް ވެސް އެންމެ ރަނގަޅު ގޮތަކީ، އެމީހަކު ހުރި ތަނެއްގައި ދެމިހުރުން ކަމަށް ގަބޫލުފުޅު ކުރައްވާތީ ކަމުގައި ޖުމްހޫރީ ޕާޓީން ބުނެފިއެވެ.

Ads by MWSC

ޖުމްހޫރީ ޕާޓީން މިރޭ ނެރުނު ބަޔާނެއްގައި ބުނެފައި ވަނީ، ގާސިމް މާލެ ވަޑައިނުގަނެ މަޖިލީހަށް ސަލާމް ވިދާޅުވެ، ސަން އައިލެންޑް ރިސޯޓުގައި އެ ހުންނެވީ، މިވަގުތު މާލޭގައި ކޮވިޑުގެ ހާލަތު އޮތް ގޮތުން، އެންމެ ރައްކާތެރި ގޮތަކީ އެއީ ކަމަށް ފެނިވަޑައިގަތުމުން ކަމަށެވެ.

ކޮވިޑް ނެތް ސަރަހެއްދެއްގައި ހުރެ ކޮވިޑް ހުރި ސަރަހައްދަކަށް ގޮސް އައިސް އުޅޭއިރު، ސަމާލުވާން ޖެހޭ ކަންތައްތަކެއް ހުންނާނެ ކަމަށާއި، އެހެންކަމުން މިދަނޑިވަޅުގައި އެންމެ ރައްކާތެރި ގޮތަކީ އެމީހަކު ހުރި ތަނެއްގައި ދެމިހުރުން ކަމަށް ގަބޫލުފުޅު ކުރައްވާތީ، ގާސިމް ސަންއައިލެންޑުގައި މަޑުކުރައްވަނީ ކަމުގައި ވެސް އެބަޔާނުގައި ބުނެފައި ވެއެވެ.

މީގެ އިތުރުން ޖޭޕީން ބުނީ، ސައްހީ ގޮތުން ގައުމުގައި ކުއްލި ނުރައްކަލުގެ ހާލަތު ކަނޑައަޅައިފައިވާ ދަނޑިވަޅެއްގައި، ގާސިމް ބައްލަވަނީ ރާއްޖޭގެ އެންމެންނަށް ވެކްސިން ލިބި، ގައުމުގެ ހާލަތު އާދައިގެ ހާލަތަކަށް ބަދަލުވުމާއެކު، އެއްތަނުން އަނެއްތަނަށް ދަތުރުފަތުރު ކުރުމުގައި މިހާރު ހުރި ހުރަސްތަކަށް ލުއިތަކެއް ލިބޭނެ ދުވަހަކަށް ކަމަށާއި، އުއްމީދަކީ ވީހާ ވެސް އަވަހަށް ގައުމުގެ ހާލަތު ބަދަލުވެގެން ދިއުން ކަމަށެވެ.