ނަޝީދަކީ ދޫންޏެއްގެ ގޮތުގައި ސިފަކުރެއްވުމުން ޝުކުރު އަދާކުރައްވައިފި
ރައްޔިތުންގެ މަޖިލީހުގެ ރައީސް މުހައްމަދު ނަޝީދަކީ ދޫންޏެއްގެ ގޮތުގައި ނައިފަރު ދާއިރާގެ މެމްބަރު އަހުމަދު ޝިޔާމް ސިފަކުރެއްވުމުން އެކަމަށް ޓަކައި ނަޝީދު ޝުކުރު އަދާކުރައްވައިފިއެވެ.
19 ވަނަ ރައްޔިތުންގެ މަޖިލީހުގެ 2021 ވަނަ އަހަރުގެ ތިންވަނަ ދައުރުގެ 28 ވަނަ ޖަލްސާގައި ވާހަކަދައްކަވަމުން މެމްބަރު ޝިޔާމް ވަނީ ނުސީދާކޮށް ރައީސް ނަޝީދަށް ބަހުގެ ހަމަލާތަކެއް ރައްދުކުރައްވައިފައެވެ. ދޫންޏެއްގެ ގޮތުގައި ރައީސް ނަޝީދު ސިފަކުރައްވަމުން ޝިޔާމް ވިދާޅުވީ އެކި މޫސުމުގައި ދޫނި ސޫފާސޫފި އަންނާނެކަމަށެވެ. އެގޮތުން ޔޫކޭއިން ވެސް ބައެއް ދޫނި އަންނަކަމަށް ވިދާޅުވިއެވެ.
"ޔޫކޭއިން ވެސް އެބަ އާދޭ ދޫނި ފަހަރު. ހަމަ މޫސުމީ އެއްޗެހި. އިއްޒަތްތެރި ރައީސް އަޅުގަނޑުމެން ނޭދެން ސަރުކާރުން ފިޔަ ކޮށާކަށް. ސަރުކާރުން މި ދޫނިފަހަރު ބަންނާކަށް. ޓޭޕު އަޅާކަށް އަޅުގަނޑުމެން ނޭދެން. ރައްޔިތުން ހަމަ ނޭދޭ މި ދޫނިފަހަރު ބަލަހައްޓަން މާ ބޮޑު ހޭދައެއް ރައްޔިތުންގެ ފައިސާއިން ކުރާކަށް ވެސް" ރައީސް ނަޝީދަށް އަމާޒުކޮށް ޝިޔާމް ނުސީދާކޮށް ވިދާޅުވިއެވެ.
ޝިޔާމް ވިދާޅުވީ ދުވާލެއްގެ މައްޗަށް 6،000 ނުވަތަ 7،000 ޑޮލަރު މީގެން ދޫންޏަކަށް ހޭދަކުރާކަމަށްވާ ނަމަ ރައްޔިތުން ވަރަށް ހިތާމަކުރަން ޖެހިދާނެކަމަށެވެ. މިފަދަ ކަންކަން ކުރާ ނަމަ އޮޑިޓް އޮފީހުގެ މަސައްކަތް އިތުރަށް ހަރުދަނާކުރަންޖެ ހޭނެ ކަމަށް ޝިޔާމް ވިދާޅުވިއެވެ.
ޝިޔާމްގެ ވާހަކަފުޅާ ގުޅިގެން ރައީސް ނަޝީދު ވަނީ ދޫންޏެއްގެ ގޮތުގައި އެމަނިކުފާނު ސިފަކުރެއްވީތީ ޝިޔާމަށް ޝުކުރު އަދާކުރައްވައިފައެވެ. އަދި ވިދާޅުވީ އެފަދައިން ވިދާޅުވުމުން ހިތަށް އުފާވެރިކަން ލިބިލައްވާކަމަށެވެ.
ރައީސް ނަޝީދަށް މި އަހަރުގެ މެއިމަހުގެ ތެރޭގައި ދިން ޓެރަރިސްޓު ހަމަލާއާ ގުޅިގެން އިނގިރޭސިވިލާތާއި ޖަރުމަނަށް ވަޑައިގެންނެވުމަށް ފަހު އަނބުރާ ރާއްޖެ ވަޑައިގެންނެވުމުން އެމަނިކުފާނުގެ ސެކިއުރިޓީގެ ކަންކަން ވަނީ ވަރަށް ބޮޑަށް ވަރުގަދަކޮށްފައެވެ. މީގެ އިތުރުން އެމަނިކުފާނު މިވަގުތު ދިރިއުޅުއްވަމުން ގެންދަވަނީ ވެސް މާލޭގައި ހުންނަ އެންމެ އަގު ބޮޑު ހޮޓެލްގައެވެ.
ރައީސް ނަޝީދު މީގެ ކުރިން ވިދާޅުވީ އެމަނިކުފާނު ހުންނަވަން ބޭނުންވެވަޑައިގަންނަވަނީ އަމިއްލަފުޅު ގޭގައި ކަމަށެވެ. އެހެން ނަމަވެސް ދައުލަތުން އެމަނިކުފާނު ދިރިއުޅުއްވާނެ ތަނެއް ހަމަޖައްސަންދެން ހޮޓެލް ޖެންގައި ހުންނަވަން ޖެހިވަޑައިގަންނަވާ ކަމަށް ވިދާޅުވިއެވެ. އެމަނިކުފާނު ވިދާޅުވީ މިހާރު އެމަނިކުފާނު ދިރިއުޅުއްވުމުގެ ހަރަދު ބައްލަވަނީ ވެސް ދައުލަތުން ކަމަށެވެ.
މީގެ ކުރިން ދުވަހަކު ވެސް ނާހަން” ދޫނިފަހަރު” ކިޔާއަޑެއް………މޮޅު……….އަންތަރީސް ވެއްޖެ.ދައްކާ މީހާ ދެއްކިޔަސް ލިޔާ މީހާގެ ވެސް މަސްއޫލިއްޔަތެއް އޮންނަން ވާނެ.
ބޭބޭ! މީހަކު ބުނާ އެއްޗެއް ކުއޯޓް ކޮށްފައި ލިޔާއިރުގައި ލިޔުންތެރިޔާ އަމިއްލަ ބަސްބަސް ބޭނުންވީމައި އުނިކޮށްފައި އިތުރެއް ނުކުރެވޭނެ. މި ލިޔުމުގައި ނެތް މައްސަލައެއް. އެކަމަކު ޝިޔާމް ވިދާޅުވިއިރު އެއޮތީ ކުށްބަހެއް ވިދާޅުވެފައި.
ކޮންމެމީހަކަށްވެސް ވާހަކަ ދައްކާއިރު ކުށްބަހެއް ކީދާނެ އެއީ އިންސާނުންވީމަ މާބޮޑު މައްސަލައަކަށް ހެދުމަކީ ރަނގަޅު ކަމެއްނޫން