މެންބަރުން އިންތިހާބު ކުރާ ގޮތް ބަދަލުކުރަން ރައީސް ނަޝީދު ގޮވައިލައްވައިފި

ރައްޔިތުންގެ މަޖިލީހަށް މެންބަރުން އިންތިހާބުކުރާ ގޮތް ބަދަލު ކުރަން އެ މަޖިލީހުގެ ރައީސް މުހައްމަދު ނަޝީދު ގޮވައިލައްވައިފިއެވެ.

Ads by STELCO

ރައީސް ނަޝީދު މިކަމަށް ގޮވައިލެއްވީ ޓްވިޓާގައި މިއަދު އާންމު ކުރެއްވި މަޒުމޫނެއް މެދުވެރިކުރައްވައެވެ. އެ މަޒުމޫނުގައި އެމަނިކުފާނު ވިދާޅުވީ، ރައްޔިތުންގެ މަޖިލީހަށް މެންބަރުން އައްޔަންކުރުމުގައި މިހާރު ހަމަޖެހިފައިވާ އުސޫލުތައް ބަދަލުކުރަން ޖެހޭ ކަމަށެވެ.

ރައީސް ނަޝީދު މިއަދު އާންމު ކުރެއްވި އެ މަޒްމޫނުގައި ވިދާޅުވީ 5000 މީހުން ހިމެނޭ އިންތިހާބީ ދާއިރާއެއްގެ މައްޗަށް މަޖިލިސް އެކުލެވިގެންވާ އިރު ކޮންމެ މެމްބަރެއް ތަމްސީލް ކުރައްވަނީ ވަކި ސަރަހައްދެއް ނުވަތަ ވަކި ރަށްތަކެއް ކަމަށެވެ.

އެހެންކަމުން އެ އުސޫލުން ކުރިއަށް ދިޔުމުން، ކޮންމެ ފަސް އަހަރަކުން ރައްޔިތުންގެ މަޖިލީހުގެ ގޮނޑިތައް އިތުރުވަމުންދާ ކަމަށް ވެސް ރައީސް ނަޝީދު ވިދާޅުވިއެވެ. އަދި މިކަމަކީ ހައްލެއް ގެންނަން ޖެހޭ ކަމެއް ކަމަށް ވެސް އެމަނިކުފާނު ވިދާޅުވިއެވެ.

"މި ބާވަތުގެ ބަދަލު ގެނައުމަކީ ބޭނުންތެރި ކަމެކެވެ. މަޖިލީހުގެ މެންބަރުންނަށް އެ ބޭފުޅުންގެ ރަށްތައް ތަމްސީލު ކުރުން ފިޔަވައި އެހެން ކަމެއް ކުރުން ދައްޗެވެ. ގައުމީ ނަޒަރަކުން ކަންކަމާ ވަކާލާތު ކުރާނެ ބަޔަކު ބޭތިއްބުމަށް ނެޝަނަލް ލިސްޓްގެ މެންބަރުންގެ ބޭނުންތެރިކަން ވަނީ އެތައް ގައުމެއްގެ ސިޔާސީ ހަޔާތް ކަށަވަރު ކޮށްދީފައެވެ،" ރައީސް ނަޝީދު ވިދާޅުވެފައިވެއެވެ.

މީގެ އިތުރުން ރައީސް ނަޝީދު ވިދާޅުވީ ރައްޔިތުންގެ މަޖިލީހަށް ހުށައެޅޭ ގިނަ ބިލްތަކާއި ގަރާރު އަދި މައްސަލަތައް ވެސް ހުށައެޅެނީ މުޅި ރާއްޖެއަށް ނިސްބަތްކޮށް ކަމަށްވީއިރު، ވަކި ރަށަކަށް ނިސްބަތްކޮށް ހުށައަޅާ ގިނަ ކަންކަމަކީ އެ ރަށެއްގެ މައްސަލައެއްގެ ގޮތުގައި ހުށައެޅޭ ކަންކަން ނޫން ކަމަށެވެ. އަދި އެ ރަށެއްގައި އެކަން ހިނގިތީ އެ ރަށަކަށް ނުވަތަ ސަރަހައްދަކަށް ނިސްބަތް ވަނީ ކަމަށާއި މެންބަރުން އިންތިހާބުވެފައި ވަނީ ސަރަހައްދުތަކުން ކަމުން މެންބަރުން ވަކާލާތު ކުރަނީ ރަށާއި އަތޮޅަށް ފަހިވާ ގޮތަށް ކަމަށް ރައީސް ނަޝީދު ވިދާޅުވިއެވެ.

މަޖިލިސް އެކުލެވިގެންވާ ގޮތް ބަދަލުކުރާ އިރު ގައުމީ ލިސްޓުގައި ވަކި އަދަދަކަށް އަންހެނުން ކަނޑައެޅުމަކީ ވެސް ކުރެވިދާނެކަމެއް ކަމަށް ވެސް ރައީސް ނަޝީދު ވިދާޅުވިއެވެ.