ނަޝީދު ވަކިކޮށްފިނަމަ ދެން އަންނަ ރައީސް އެއް ދަރަޖަ ''ނުލަފާވާނެ'' : ޕީޕީއެމް
ރައްޔިތުން މަޖިލީހުގެ ރައީސްކަމުގެ މަގާމުން ރައީސް މުޙައްމަދު ނަޝީދު ވަކިކޮށްފިނަމަ ދެން އަންނަ ރައީސަކު އެއަށްވުރެ އެއް ދަރަޖަ ''ނުލަފާވާނެ'' ކަމަށް ޕީޕީއެމްއިން ބުނެފިއެވެ.
އަންނަ ޖެނުއަރީ މަހުން ފެށިގެން ޖީއެސްޓީ %6 އިން %8 އަށް ބޮޑު ކުރުމަށާއި ޓީޖީއެސްޓީ %8 އިން %16 އަށް ބޮޑު ކުރުމަށް ސަރުކާރުގެ ފަރާތުން ރައްޔިތުން މަޖިލީހަށް ހުށަހެޅި ބިލު މަޖިލީހުގެ މުޅި ކޮމިޓީން ދިރާސާ ކުރުމަަށްފަހު ނިންމެވީ ބިލަށް ބަދަލެއް ނުގެނެސް ބިލު އޮތް ގޮތަށް ފާސްކުރުމަށެވެ.
މިދިޔަ ހޯމަ ދުވަހު ކޮމިޓީގެ ރިޕޯޓު މަޖިލީހުގެ ތަޅުމަށް ހުށަހެޅުއްވި ނަމަވެސް އެ ދުވަހު ވެސް އަދި އަންގާރަ ދުވަހު ވެސް ވޯޓަށް އަހާފައެއް ނުވެއެވެ. އެ ގޮތުން ރައީސް އިބްރާހިމް މުޙައްމަދު ޞާލިޙްގެ ފެކްޝަނުގެ މެންބަރުން އިއްޔެ ވަނީ މުލިއާގެއަށް ވަޑައިގެން ނަޝީދުގެ ޝަކުވާ ވެސް ކުރައްވައިފައެވެ.
ޓެކްސް ބޮޑު ކުރުމުގެ ބިލަށް ވޯޓަށް އެހީ މިއަދުގެ ޖަލްސާގައެވެ.
ބިލުގެ ވޯޓަށްފަހު ޕީޕީއެމްގެ ޕާލަމެންޓްރީ ގުރޫޕުން މިއަދު ބޭއްވި ނޫސްވެރިންގެ ބައްދަލުވުމުގައި މަޑުއްވަރީ ދާއިރާގެ މެންބަރު އާދަމް ޝަރީފް ވިދާޅުވީ މަޖިލީހުގެ ރައީސް މިހާރު ވަނީ ކޮމްޕްރޮމައިޒްވެފައި ކަމަށެވެ. އަދި ބިލާ ދެކޮޅަށް މަޖިލީހުގެ ރައީސްގެ ވެސް ކަންބޮޑުވުން ހުރި ކަމަށާއި ނަމަވެސް އިތުބާރު ނެތްކަމުގެ ވޯޓު ނަގާފާނެ ކަމުގެ ބިރަށް މިއަދު ވޯޓަށް އެއްސެވީ ކަމަށް ބެލެވޭ ކަމަށެވެ.
އެއީ ވަރަށް ގިނަ މެންބަރުން ނޯ ކޮންފިޑެންސް ވޯޓުގަ ސޮއިކުރައްވާފައި އޮތީމަ އަޅުގަނޑުމެންނަށް ގަބޫލު ކުރެވޭ ގޮތުން މަޖިލީހުގެ ރައީސަށް މި ވަގުތު މަޖިލީހުގެ ރައީސް ބޭނުންފުޅުވާ ގޮތަށް އެކަން ކޮށްފިކަމަށްވާނަމަ މަޖިލީހުގެ ރައީސް މަގާމުން ވަކިކުރުމުގެ ބިރު އެބައޮތް. ރައީސް ނަޝީދާ ވާދަވެރި އެމްޑީޕީގެ ފެކްޝަނުން އިންޒާރުދީފަ އެބަ އޮތް.
''އެހެން އެކަން އެ ގޮތަށްދާކަމަށްވާނަމަ އަޅުގަނޑު ދެކޭ ގޮތުގައި މަޖިލީހުގެ ރައީސަށް މިހާރު ޖެހިފައި އެ ހުރީ ހަމަ ފުޅަތްނގަށް ޖެހިފައި އޮތް އެތިފަހަރު'' ކަމަށް އާދަމް ޝަރީފް ވިދާޅުވިއެވެ.
އާދަމް ޝަރީފް ވިދާޅުވީ ނަޝީދުގެ އިތުބާރު ނެތްކަމަށް އެމްޑީޕީގެ ގިނަ މެންބަރުންގެ ވޯޓު ލިބިފައި އޮތް ނަމަވެސް ރައީސް ނަޝީދު މަގާމުން ވަކިކުރަން ކެރޭހައި ހިތްވަރު ހުރިކަމަކަށް ގަބޫލެއް ނުކުރެވޭ ކަމަށެވެ. އަދި އެފަދަ ހިސާބެއްގައި ހުރިއިރު މަޖިލީހުގެ ރައީސް އަމިއްލަފުޅަށް އިސްތިއުފާ ދެއްވި ނަމަވެސް އެމްޑީޕީގެ ފަރާތުން މަޖިލީހުގެ ރައީސްކަމަށް ދެން ވަޑައިގަންނަވާ ބޭފުޅަކު އެއަށްވުރެ އެއް ދަރަޖަ ''ނުލަފާވާނެ'' ކަމަށް ގަބޫލު ކުރެވޭކަމަށް އާދަމް ޝަރީފް ވިދާޅުވިއެވެ. އަދި އެހެން ބޭފުޅަކު ވަޑައިގަތް ނަމަވެސް އިދިކޮޅަށް ވަކި ރަނގަޅެއް ނުވާނެ ކަމަށް އޭނާ ވިދާޅުވިއެވެ.
ޝަރީފް ގަބޫލު ކުރައްވާ ގޮތުން މަޖިލީހުގައި އިދިކޮޅުގެ ދައުރު އަދާކުރުމުގެ ފުރުސަތު ނަޝީދު ވަނީ ފަހިކޮށްދެއްވާފައެވެ. ނަމަވެސް އެމްޑީޕީގެ ބައެއް މެންބަރުން މަޖިލީހުގައި އަމަލު ކުރައްވާ ގޮތުން ބައެއް ފަހަރު އިދިކޮޅުގެ ދައުރު އޭގެ އެންމެ ފުރިހަމަ ގޮތުގައި އަދާކުރަން ދަތިތަކެއް ކުރިމަތިވާކަން ޝަރީފް ފާހަގަކުރެއްވިއެވެ.
އެހެން އޮތްކަމުގައި ވިޔަސް މިހާ ހިސާބަށް އައިއިރުގަ އަޅުގަނޑުމެން ފާހަގަކުރަން ބޭނުން މަޖިލީހުގެ ރިޔާސަތުން ވަނީ މަޖިލީހުގެ އިދާރާއިން ވެސް ވާދަވެރި އޮޕޮޒިޝަންއަށް ފުރުސަތުތަކެއް ފަހިކޮށްދީފައި.
މީގެ އިތުރުން ޝަރީފް ވިދާޅުވީ މިހާރު ކަންކަން ހުރި ގޮތުން ރައީސް ނަޝީދުގެ ޒިންމާ އަދާކުރައްވަން މިހާރު އެންމެ ރަނގަޅު ފަހި ފުރުސަތެއް އޮތް ކަމަކަށް ވެސް ގަބޫލެއް ނުކުރެވޭ ކަމަށެވެ.
މިރޮޒައިނާ ގޮއްޔަ އަކީ ލަދު ހަޔާތް ކުޑަ ކަންޑިި އެއްބާ ؟