ކުރީ ސަރުކާރުގެ ހަނދާންތައް އައު ކުރައްވައި ޝާހިދު ވިދާޅުވީ، ރައީސް ޞާލިޙު ރިޔާސީ އިންތިޚާބު ނަންގަވާނީ ގަދަކޮށް ކަަމަށް

މި އަހަރުގެ ސެޕްޓެމްބަރުމަހުގެ 09 ވަނަ ދުވަހު ބާއްވާ ރިޔާސީ އިންތިޚާބު، ރައީސް އިބްރާހީމް މުޙައްމަދު ޞާލިޙު ގަދަކޮށް ނަންގަވާނެ ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.

Ads by STELCO

އެމްޑީޕީގެ ރިޔާސީ ޕްރައިމަރީ ކާމިޔާބު ކުރެއްވި އެ ޕާޓީގެ އިސް ލީޑަރު، ރައީސް އިބްރާހީމް މުޙައްމަދު ޞާލިޙަށް ރަސްމީކޮށް ރިޔާސީ ޓިކެޓު އެރުވުމަށް މިރޭ ކާނިވާ ސަރަހައްދުގައި ކުރިއަށް ގެންދާ ހާއްސަ ޖަލްސާގައި ވާހަކަ ދައްކަވަމުން ފޮރިން މިނިސްޓަރު ޝާހިދު ވިދާޅުވީ ރައީސް ޞާލިޙުގެ ވެރިކަމުގައި ޤައުމަށް އައިސްފައިވަނީ މިނިވަން ނޫރާނީ ދައުރެއް ކަމަށާއި، ރައްޔިތުން ބޭނުންވާ އެތައް ކަމެއް މި ސަރުކާރުން ފުއްދައިދެމުން އަންނަ ކަަމަށެވެ. ޝާހިދު ވިދާޅުވީ އެންމެން މިއަދު ނުކުމެ ތިބީ، ޤައުމަށް އައި މިނިވަން ނޫރާނީގެ ހަނދާންތައް އައު ކުރަން ކަމަށެެވެ.

"އަޅުގަނޑުމެން މިއަދު ހަނދާން އާ ކުރަމުން މިގެންދަނީ، ދައުލަތެއްގެ ސިފަ އަޅުގަނޑުމެންގެ މި ގައުމުގައި ޖެހެމުންދާ ދިޔުން."

ޝާހިދުގެ ވާހަކައިގައި ރައީސް އަބްދުﷲ ޔާމީން އަބްދުލްޤައްޔޫމްގެ ސަރުކާރަށް ވަރަށް ބޮޑަށް ފާޑު ވިދާޅުވިއެވެ. އެގޮތުން ރައީސް ޔާމީންގެ ވެރިކަމަކީ އަނިޔާވެރި، ޖައްބާރު ވެރިކަމެއް ކަމަށް ވިދާޅުވެ، އެ މަނިކުފާނުގެ ވެރިކަމުގައި ދިވެހި ދައުލަތުގެ ހުރިހައި ސިފައެއް ކަނޑައިލި ކަމަށް ޝާހިދު ވިދާޅުވިއެވެ.

"ހަނދުމަފުޅު ކުރައްވާ، ރައްޔިތުންގެ މަޖިލީހުގެ މެމްބަރުން ރައްޔިތުންގެ މަޖިލީހުން ވަކި ވެއްޖެ ކަމަށް ނިންމާ، ތަޅުމުން ދަމާ ނެރެ، ބޮޑު ކަންނެލި އުކާހެން، ބޮޑު ކަންނެލި އުކާހެން ގޭޓު މަތިން އުކައިލީ، ރައްޔިތުންގެ ސަލާމަތީ ބާރުތަކުގެ އަތްދަށަށް، ރައްޔިތުންގެ މަޖިލިސް ގެންދިޔަ، ހަނދުމަފުޅު ކުރައްވާ. އެއީ އަނިޔާވެރިކަން، އެއީ ދައުލަތް ހަރާބު ކުރުން."

ކުރީ ސަރުކާރުން ފަނޑިޔާރު ގެއިން ޓިނު ނަގައި، ޕްރޮސެކިއުޓަރ ޖެނެރަލް އާއި ޕޮލިސް ކޮމިޝަނަރވެސް އިރު އިރުކޮޅުން ބަދަލު ކުރަމުން ދިޔަ ކަމަށާއި، މި ސަރުކާރުން އެކަން އެގޮތަށް ނުކުރާ ކަމަށެވެ.
ޝާހިދު އިތުރަށް ވިދާޅުވީ އެމްޑީޕީން ނުކުމެ ތިބީ މިނިވަން ދައުލަތެއް ޤާއިމު ކުރުމަށް ކަމަށްވެސް ޝާހިދު ވިދާޅުވިއެވެ.

ޝާހިދު އިތުރަށް ވިދާޅުވީ ޤައުމު ރައްކާތެރިކަމުގެ އަމާން ބަނދަރަކަށް ގެންގޮސް ދެއްވީ ރައީސް ޞާލިޙު ކަމަށެވެ. މި މޭރުމުން ވާހަކަފުޅު ދައްކަވަމުން ރައީސް ޞާލިޙުގެ ވެރިކަމުގައި ހޯދުނު ބައެއް ކާމިޔާބީތަކަށް ޝާހިދު އަލިއަޅުވައިލެއްވިއެވެ. އެގޮތުން މި ދައުރު ނިމޭއިރު، ހުރިހާ ރަށަކުން ސާފު ބޯފެން ލިބޭނެ ކަމަށާއި، ނިމިގެން ދިޔަ މަހު އެކަނިވެސް 150،000 ދަތުރުވެރިން އާރްޓީއެލްއިންވެސް ދަތުރު ކޮށްފައިވާ ކަަމަށް ވިދާޅުވިއެެވެ.

އަދި 20،000 ވަޒީފާ އުފެއްދި، މިނިމަމް ވޭޖުގެ ފައިދާވެސް އެތައް ބަޔަކަށް ލިބިފައިވާ ކަަމަށް އޭނާ ވިދާޅުވިއެެެވެ. ޝާހިދު އިތުރަށް ވިދާޅުވީ 16،500 ދަރިވަރުން މިހާރު ހިލޭ ޑިގްރީއަށް ތައުލީމު ހާސިލު ކުރަމުން އަންނަ ކަމަށެވެ.

އޭނާ އިތުރަށް ވިދާޅުވީ ރަން ރީނދޫ ކުލަ ދާނީ ގަދަ ވަމުން ކަމަށާއި، ރިޔާސީ އިންތިޚާބު ރައީސް ޞާލިޙު ނަންގަވާނީ ގަދަކޮށް ކަމަށެވެ.