ހަބޭސް ކިޔާފައި ލާރި އެބަ އަޅާ، އެޅި ވަރަކަށް ހިފާތި، އެކަމަކު ވޯޓާ ނުގުޅުވާތި: ޤާސިމް
ރިޔާސީ އިންތިޚާބާއި ދިމާކޮށް އެކި އެކި ޕާޓީތަކުން ވޯޓު ގަންނަން ލާރި ދޭކަމަށާއި އެ ލާރީގައި ހިފިޔަސް ވޯޓު އަޅުއްވާއިރު ވިސްނެވުމަށް ޖުމްހޫރީ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމް ރައްޔިތުންގެ ކިބައިން އެދިވަޑައިގެންފިއެވެ.
ކުރިއަށް އޮތް އިންތިޚާބުގެ ކެމްޕޭނަށް އައްޑޫ ސިޓީއަށް ވަޑައިގެން އެ ރަށުގައި ބޭއްވި ޖަލްސާއެއްގައި ވާހަކަފުޅު ދައްކަވަމުން ޤާސިމް ވިދާޅުވީ ޕީޕީއެމްއާއި އެމްޑީޕީ ވެރިކަމަށް ގެނައުމަށް އެމަނިކުފާނަށް މަސައްކަތްކުރެވިއްޖެކަމަށާއި އެކަމަކު އެ ހުރިހާ ކަމަށްފަހު އެ ސަރުކާރުތައް ފެއިލްވެއްޖެކަމަށެވެ.
"އެމްޑީޕީއަށް ދެފަހަރު ވެރިކަން ހޯދައިދޭން އަޅުގަނޑު ތާއީދުކޮށފީމޭ، ޕީޕީއެމްއަށް ތާއީދުކޮށްގެން ހޯދައިދީފީމޭ، ހުރިހާ ކަމަކަށް ފެއިލްވެގެން ދިޔައިރު އަޅުގަނޑުގެ ޒިންމާއެކޭ މި ދިވެހިރާއްޖޭގެ ލޮބުވެތި ރައްޔިތުން ސަލާމަތް ކުރުމަށްޓަކައި ނިކުތުމަކީ" ޤާސިމް ވިދާޅުވިއެވެ.
އެހެންކަމުން މިފަހަރު ރައްޔިތުން ވޯޓު އަޅުއްވަންވީ އެންމެ ރަނގަޅަށް ސަރުކާރު ހިންގޭނެ ބަޔަކަށް ކަމަށާއި އެއީ ޤާސިމް އިބްރާހިމާއި ޖޭޕީއަށްކަމަށް އެމަނިކުފާނު ވިދާޅުވިއެވެ.
"ލާރިވެސް އަޅާނެ އިނގޭތޯ, ލާރި އަޅަނީ އޮއްސައިގެން. ތިބޭފުޅުންނަށް ފެނިވަޑައިގަންނަވާނެ ކަސްޓަމުން މިހާރުވެސް ފޮށިފޮށީގައި ބަންދުކޮށްގެން ގެނައި ލާރިތައް..... ހަބޭސް ކިޔާފައި އަޅަނީ. އެހެންވީމާ އަޅުގަނޑު ދަންނަވާނީ އެޅި ވަރަކަށް ހިއްޕަވާށޭ.. ދެން ކޯއްޗެއްތޯ އަޅުގަނޑު ދަންނަވާނީ؟ އެކަމަކު ނަމަނަމަ ވޯޓް ލައްވާއިރު, ވޯޓް ލައްވާށޭ ވަރަށް ރަނގަޅަށް ވިސްނާލާފައި" ޤާސިމް ވިދާޅުވިއެވެ.
މީގެ އިތުރުން، ދެވަނަ ފަހަރަށް މިކަހަލަ ވޯޓެއް ލާން ދިވެހި ރައްޔިތުން ބޭނުންވޭތޯ ނުވަތަ މިއަދު ދޭ ޑޮލަރު ކޮޅެއް ނުވަތަ ރުފިޔާއެއްގައި ހިފައިގެން ވޯޓު ވިއްކާލައި މި ގައުމުގެ މިނިވަންކަމާއި އިސްތިޤްލާލު ދޫކޮށްލާނީތޯ ޤާސިމް ވަނީ ސުވާލުކުރައްވާފައެވެ.
އެހެންކަމުން މީހަކު އެއްޗެއް ދިނުމުން އޭގައި ހިފިނަމަވެސް، ކާބަފައިން ބުނާހެން "އަސް ވިއްކިޔަސް، ލަގަން ނުވިއްކާށޭ" ބުނާ ބީދައިން މިފަހަރު ވޯޓު އަޅުއްވާއިރު ވަރަށް ވިސްނާވަޑައިގެން އެކަން ކުރެއްވުމަށް ޤާސިމް އެދިވަޑައިގަތެވެ.
ރަނގަޅަށްތިބުނީ. ކަލޭ ކިތަންމެ ވަރަކަށް ލާރި ދިނަސް ކަލެއަކަށް ވޯޓެއް ނުލާނަން.