މާލެއެކޭ ރާއްޖެތެރެއެކޭ ތަފާތެއް ނުކުރާނަން!: ޤާސިމް
ޒަމާނުއްސުރެން ރާއްޖޭގައި އޮންނަ މާލެއާ ރާއްޖެތެރޭ ރަށްރަށުގެ ތަފާތުތައް ނައްތާލައި، ހުރިހާ ޚިދުމަތްތަކެއް އެއްހަމައެއްގައި، އެއް އަގެއްގައި ފޯރުކޮށްދެއްވާނެކަމަށް ޖުމްހޫރީ ޕާޓީ (ޖޭޕީ) ގެ ރިޔާސީ ކެނޑިޑޭޓް ޤާސިމް އިބްރާހީމް ވިދާޅުވެއްޖެއެވެ.
ތިނަދޫ ސިޓީގައި ބޭއްވި ޖަލްސާގައި ވާހަކަ ދައްކަވަމުން ޤާސިމް ވިދާޅުވީ އަސާސީ ޚިދުމަތް ދިނުމުގައިވެސް މާލެއާއި ރާއްޖެތެރޭ ރަށްރަށުގައި ތަފާތުކުރުން ގެންގުޅޭކަމަށާއި އެކަން ހުއްޓާލަންޖެހޭކަމަށެވެ. އަދި އެމަނިކުފާނުގެ ވެރިކަމެއްގައި މި ހުރިހާ ކަމެއްގައި އޮންނަ ތަފާތުކުރުންތައް ނައްތާލައްވާނެކަމަށް ވިދާޅުވިއެވެ.
"އަޅުގަނޑުގެ ވެރިކަމެއްގައި ރާއްޖޭގެ ހުރިހާ ތަނެއްގައި ވެސް އޮންނާނީ އެއް އަގެއް، މާލެ އެކޭ ރާއްޖެތެރެއެކޭ ތަފާތެއް ނުކުރާނަން" ޤާސިމް ވިދާޅުވިއެވެ.
ޖޭޕީގެ ވެރިކަމެއްގައި ކަރަންޓާއި ފެނަށް މިހާތަނަށް ނަގާފައިވާ ޖޫރިމަނާތައް މަޢާފުކޮށްދެއްވާނެކަމަށް ވިދާޅުވިއެވެ. ޤާސިމް ވަނީ އެކި ސަރުކާރުތަކުން މާލޭގައި ޤާއިމުކޮށްފައިވާ ގެދޮރުވެރިކަމުގެ މަޝްރޫއުތަކުން ގެދޮރު ލިބިފައިވާ އެންމެންގެ ކުލި މަޢާފުކޮށްދެއްވާނެކަމަށް ވެސް ވިދާޅުވެފައެވެ. ރޭގައި ބޭއްވި ޖަލްސާގައި ޤާސިމް ވަނީ މާލެއާއެކު އަތޮޅުތެރޭގެ ހުރިހާ ހައުސިން ޔުނިޓުތަކުން ކުލި މަޢާފުކޮށްދެއްވާނެކަމަށް ވިދާޅުވެފައެވެ.
ތިނަދޫ ސިޓީގައި ބޭއްވި ޖަލްސާގެ ތެރެއިން، ފޮޓޯ: ޖޭޕީ
ޤާސިމް ވަނީ ބޯހިޔާވަހިކަމުގެ މަޝްރޫޢުގައި ރައްޔިތުންނަށް އެތަންތަން ބަހާފައިވަނީ އެއްވެސް ހަމައެއް ލަމައެއް ނެތި އަދި އިންސާފުވެރިގޮތެއްގައި ނޫންކަމަށް ވިދާޅުވެފައެވެ. އަދި ކޮންމެ ސަރުކާރަކުންވެސް ރައްޔިތުންނަށް ބޮޑެތި ވައުދުތައްވެ، ރައްޔިތުންގެ ލޮލުގައި އަނދުން އެޅުވި ނަމަވެސް އެއްވެސް ކަމެއް ކޮށްދީފައިނުވާކަމަށް އެމަނިކުފާނު ވިދާޅުވިއެވެ. އަދި މާލެ އަކީ އުޅެން ހެޔޮވާވަރު ތަނެއްނޫންކަމަށް ބުނެ ސަރުކާރަށް ވަނީ ފާޑުވިދާޅުވެފައެވެ.
ރާއްޖެތެރޭ ރަށްރަށުގައި ބޯހިޔާވަހިކަމުގެ މަޝްރޫޢުތައް ހިންގާނީ ދުނިޔޭގެ އެންމެ ތަހުޒީބުވެފައިވާ ޔުނިވާސިޓީއާއި އެކަމުގެ ޢިލްމު ލިބިފައިވާ މާހިރުންގެ ލަފަޔާއި ބައިވެރިވުން ލިބިގެންކަމަށް ޤާސިމް ވަނީ ވިދާޅުވެފައެވެ.
Ads by STO
