ކޮވިޑް-19: އައްޑޫ ސިޓީ އަނެއްކާ ވެސް މޮނިޓަރިންއަށް!
އައްޑުސިޓީ ހިތަދޫން، ކަރަންޓީނުގައި ނެތް މީހަކު ކޮވިޑް-19އަށް ފައްސިވުމާ ގުޅިގެން އެ ސިޓީއަށް އަރައި ފޭބުން މަނާކޮށްފިއެވެ.
މީގެކުރިން އައްޑޫސިޓީ ހުޅުމީދޫން ވެސް މީހަކު ކޮވިޑް-19 އަށް ފައްސިވެގެން، އެ ރަށަށް އަރާ ފޭބުން ވެސް މަނާ ކުރިއެވެ. ނަމަވެސް ހިތަދޫން މީހަކު ފައްސިވުމާ ގުޅިގެން މިހާރު މިވަނީ އައްޑު ސިޓީގައި ގުޅިފައިވާ ހުރިހާ ރަށްތައް ވެސް މޮނީޓަރިންގަށް ލާފައެވެ.
ރާއްޖޭގެ ކޮވިޑްގެ ހާލަތަށް ބަލާއިރު، ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އެންމެ ފަހުން އާންމުކުރި ތަފާސް ހިސާބުތަކުން ދައްކާ ގޮތުގައި އެންމެ ގިނަ ބަޔަކު އިއްޔެ ފައްސި ވެފައިވަނީ އަތޮޅުތެރެއިންނެވެ. އެގޮތުން އަތޮޅުތެރެއިން އިއްޔެ 242 މީހުން ފައްސި ވެފައިވާއިރު މާލެ ސަރަޙައްދުން ފައްސިވެފައިވަނީ 193 މީހުންނެވެ.
ރާއްޖެއިން އިއްޔެ 465 މީހުން ކޮވިޑް-19 އަށް ފައްސި ވެފައިވެއެވެ. މި އަދަދާއެކު ރާއްޖެއިން މި ބައްޔަށް ފައްސިވީ މީހުންގެ އަދަދު މިވަނީ 29،835 އަށް އަރާފައެވެ.
