ޝަރީފްގެ ވާހަކަތަކުން އިންތިހާބު "ފޭރިގެންފައި" އޮތްކަން ޔަގީންކޮށްދޭ: ޝިޔާމް

އެންމެ ފަހުން ބޭއްވި ރިޔާސީ އިންތިހާބާ ގުޅުވައިގެން ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ދެއްކެވި ވާހަކަފުޅަށް އިލެކްޝަންސް ކޮމިޝަންގެ ކުރީގެ ރައީސް އަހުމަދު ޝަރީފު ދެއްވި ރައްދުން، އެ އިންތިހާބު "ފޭރިގެންފައި" އޮތްކަން ޝައްކެއް ނެތް މިންވަރަށް ޔަގީންކޮށްދޭ ކަމަށް ޕީޕީއެމްގެ ނައިބު ރައީސް އަހުމަދު ޝިޔާމް ވިދާޅުވެއްޖެއެވެ.

Ads by STELCO

އިދިކޮޅު ޕީޕީއެމްގެ ފަރާތުން ރޭ ކާނިވާ ސަރަހައްދުގައި ރޭ ބޭއްވި ޖަލްސާގައި ވާހަކަ ދައްކަވަމުން ރައީސް ޔާމީން ވިދާޅުވީ ޝަރީފަކީ ޚާއިނެއް ކަމަށާއި 2018ވަނަ އަހަރު އިންތިހާބު އޮޅުވައިލި ގޮތް ސާފު ކޮށްދެއްވާނެ ކަމަށެވެ. އެމަނިކުފާނު ވިދާޅުވީ ވެރިކަން ބަދަލުވެ ދިޔަ ގޮތާއި އިންތިހާބުގެ އޮޅުވައިލުންތައް ދައުލަތުގެ މުއައްސަސާތަކުގެ ވެރިންގެ ގޮތުގައި ތިއްބެވި ބޭފުޅުންނަށް ވަރަށް ސާފުކޮށް އެނގިވަޑައިގަންނަވާނެ ކަމަށާއި ހާއްސަކޮށް އަސްކަރިއްޔާގައި އިސްކޮށް ތިއްބެވި ބޭފުޅުންގެ ދައުރު އެކަމުގައި ބޮޑު ކަމަށެވެ.

"ވެރިކަން ބަދަލުވެގެން ދިޔަ ގޮތް އިންތިޚާބު ބަދަލުވެގެން ދިޔަ ގޮތް ނޭނގޭނެ އެއްވެސް މުއައްސަސާއެއްގެ އިސް މީހަކު ނުހުންނާނެ. އެ މީހުން މިއަދު ރައްޔިތުންނަށް ޖަވާބުދާރީވާން ޖެހޭ. ﷲގެ ރަހުމަތުން މޭޒުގެ އަނެއްކޮޅުގައި ޕީޕީއެމް ތިބޭ ދުވަހަކުން މިކަމުގެ ހަގީގަތް އެނގޭނެ. ރައްޔިތުންނަށް އެކަން އެނގޭނެ" ރައީސް ޔާމީން ވިދާޅުވިއެވެ.

ރައީސް ޔާމީންގެ މި ވާހަކަތަކަށް ރައްދު ދެއްވަމުން ޝަރީފު މިއަދު ކުރެއްވި ޓްވީޓެއްގައި ވިދާޅުވީ ރައްޔިތު އެންމެން ކުރިމަތީގައި ވޯޓުލައި، ވޯޓު ގުނައި، ސާފު ވޯޓަކުން ބަލިވީމަ ބަލި ޤަބޫލު ނުކޮށް ޕޯޑިއަމްއަށް އަރައި ހުރެ މާ "ކޫލް ކަމެއް" ކަމަށް ހީކޮށް ތަންދޮރު ނުދަންނަ ޖާހިލެއްހެން ހިތަށް އެރިހައި އެއްޗެއް ކިޔުމަކީ ރައީސްކަން ކުރައްވާފައިވާ ބޭފުޅަކު ކުރައްވަން މާ ރީތި ކަމެއް ނޫން ކަމުގައެވެ.

މިވާހަކަތަކަށް ރައްދު ދެއްވަމުން ޝިޔާމް މިއަދު ކުރެއްވި ޓްވީޓެއްގައި ވިދާޅުވީ 2018ގައި ރިޔާސީ އިންތިހާބު ބޭއްވި އިރު އިލެކްޝަންސް ކޮމިޝަންގެ ރައީސްކަމުގައި ހުންނެވި ބޭފުޅަކު އެފަދަ އިބާރާތަކުން ޓްވީޓު ކުރެއްވުމުން ރާވައިގެން އިންތިހާބު ފޭރިގެންފައި އޮތްކަން ޝައްކެއް ނެތް މިންވަރަށް ޔަގީންކޮށްދޭ ކަމަށެވެ.

އެކަން ތަހުގީގު ކޮށްދިނުމަށް ވެސް ޝިޔާމް ވަނީ ފުލުހުންނަށާއި، ޕްރޮސެކިއުޓާ ޖެނެރަލް އޮފް މޯލްޑިވްސް އަދި ސުޕްރީމް ކޯޓަށް ވެސް ދަންނަވައިފައެވެ.