ޤާސިމް ރައީސްކަމަށް ހޮވިއްޖެޔާ ވެރިކަން ކުރާނީ ކޯޓު ފަޓުލޫނު ލައިގެން ފިނި ކޮޓަރީގަ އިނދެގެނެއްނޫން: ޢަލީ ވަޙީދު
މި ރާއްޖޭގެ ވެރިކަމަށް ޤާސިމް އިބްރާހީމް ވަޑައިގަންނަވާފިނަމަ އޮޕަރޭޓް ކުރައްވާނީ ކޯޓު ފަޓުލޫނު ލައިގެން، ފިނި ކޮޓަރީގައި އިނދެގެން ނޫންކަމަށާއި، އެކަން ކުރައްވާނީ އަތް ކުރު ގަމީސް ލައިގެން ގްރައުންޑްގައި ހުރެގެން ކަމަށް ޖުމްހޫރީ ޕާޓީ (ޖޭޕީ) ގެ ރިޔާސީ ކެންޑިޑޭޓުގެ އިންތިޚާބީ އެޖެންޓު, ޢަލީ ވަޙީދު ފާޑު ވިދާޅުވެއްޖެއެވެ.
ފުވައްމުލަކުގައި ބޭއްވި ކެންޕެއިން ޖަލްސާގައި ވާހަކަ ދައްކަވަމުން ޢަލީ ވަޙީދު ވިދާޅުވީ ބައެއް ބޭފުޅުން ޤާސިމްއާއެކު އުޅުއްވާ ބޭފުޅުން، ޓައި އަޅުއްވައިގެން ޖަލްސާ ނުބާއްވަނީ ކީއްވެތޯ ސުވާލުކުރައްވާކަމަށާއި އަދި ރައްދުގައި ޤާސިމްއާއެކު އުޅުއްވާ ބޭފުޅުން ޓައި އެޅުމުން މިނިވަންކަން ބެދޭކަމުގެ އިހުސާސް ކުރެވޭކަމަށް ޢަލީ ވަޙީދު ވަނީ ވިދާޅުވެފައެވެ.
"ބައެއް މީހުން ވިދާޅުވޭ ޤާސިމާއެކު ކަލޭމެން ކީއްވެހޭ ރޭގަނޑު ގަޑީގަ ޓައި އަޅައިގެން ޖަލްސާ ނުބާއްވަނީ؟ ވަރަށް ރަނގަޅު ސުވާލެއް. ޤާސިމްވެސް އަދި ޤާސިމް ކައިރީގައި އުޅޭ މީހުންވެސް ޓައި އެޅީމަ ހީވަނީ މިނިވަންކަން ބެދޭހެން، ރާއްޖޭގެ ރައީސްކަމަށް ޤާސިމް ވަޑައިގަތީމަކާ ކޯޓު ފަޓުލޫނު ލައިގެން ރައީސް އޮފީހުގައި ފިނި ކޮޓަރީގަ އިނދެގެނެއްނޫން މި ޤައުމު އޮޕަރޭޓް ކުރާނީ، ހަމަ އަތްކުރު ގަމީސް ލާފައި ގްރައުންޑްގަ އޮޕަރޭޓް ކުރާނީ!" ޢަލީ ވަޙީދު ވިދާޅުވިއެވެ.
ޢަލީ ވަޙީދު ވިދާޅުވީ ކޯޓު ފަޓުލޫނު ލައިގެން ރައީސް އޮފީހުގައި އިނދެގެން ކަންކަން ބަލާ މީހުން ލައިގެން ވެރިކަން ކުރީމާ ވާނެ ހުރިހާކަމެއް ވެއްޖެކަމަށާއި، ރާއްޖެއަށް ބޭނުންވަނީ މަސައްކަތްކުރާނެ ހީވާގި ވެރިއެއްކަމަށެވެ.
"...މަސައްކަތްކުރާނެ ވެރިއެއް މި ރާއްޖެއަށް ބޭނުންވަނީ، ރާއްޖެއަކަށް ބޭނުމެއް ނުވޭ އަބުއިކަންމަތީގައި، ބޮޑެތި ބަޓަންލީ ގޮށްތައް ލައިގެން ސޫޓުލައިގެން މުޅި ރާއްޖޭގެ ކަންކަން ރައީސް އޮފީހުގައި އިނދެގެން ބަލާ ކަހަލަ ވެރިންނެއް! އެކަހަލަ މީހުން ލީމަ ވާނެ އެއްޗެއްވެފަ މިއޮތީ!"
މި ޖަލްސާލަގައި އިތުރަށް ވާހަކަ ދައްކަވަމުން ޢަލީ ވަޙީދު ވަނީ ރައީސް އިބްރާހީމް މުޙައްމަދު ޞާލިޙް ދެވަނަ ދައުރަކަށް ކުރިމަތިލެއްވި އިރު، މި ދައުރުގައި ރައީސްގެ އަރިހުގައި އިޚްލާސްތެރިކަމާއެކު ޚިދުމަތްކުރި ނާއިބު ރައީސް ފައިސަލް ނަސީމްއަށް އިތުރު ފުރުޞަތެއް ދެއްވާފައިނުވާތީ އެކަމަށް ފާޑު ވިދާޅުވެފައެވެ.
"ރާއްޖޭގެ ތާރީޚުގައި އެންމެ ފުރަތަމަ އިޚްލާސްތެރިކަމާއެއްކޮށް ދައުރެއް ފުރިހަމަކުރައްވައި ރައީސުލްޖުމްހޫރިއްޔާގެ ނައިބެއް މި ސަރުކާރުގަ ގެނެސް ބަހައްޓާފައި ހުރީ ޤާސިމް އިބްރާހިމްގެ މިންނެތް މަސައްކަތުން، ތަރުބިއްޔަތު ކުރައްވާފައި ފޮނުވާފައި، ޑެލިވަރ ކުރައްވާފަ ދައުރު އެ ނިންމާލީ!"
"އިޚްލާސްތެރިކަމުގެ އިނާމަކަށް، ރިވޯޑު އެއީ ލިބެން އޮންނަ އެއްޗެއް ނަމަ، މި ރައީސުލްޖުމްހޫރިއްޔާގެ ނައިބަކަށް ނަންގަވަން ޖެހޭނީ މި ފުވައްމުލަކަށް ނިސްބަތްވާ ފައިސަލް ނަސީމްކަން ތި ބޭފުޅުން ބުއްދިން ވިސްނައިފިއްޔާ އިނގެން ޖެހޭނެ" ޢަލީ ވަޙިދު ވިދާޅުވިއެވެ.
ޢަލީ ވަޙީދު ވަނީ ރައީސްގެ ނައިބުކަމަށް ޖުމްހޫރީ ޕާޓީގެ ފަރާތުން ފޮނުވި ފައިސަލް ނަސީމް ކުރެއްވި އިޚްލާސްތެރި މަސައްކަތަށް އެ ޕާޓީން ފަޚުރުވެރިވާކަމަށް ވިދާޅުވެފައެވެ.
ޢަލީވަޙީދު މާރުޅިގަދަކޮށްގެންހުރެ، ޖަހާފަޅާގޮތައް ވާހަކަދައްކަނީ.އަބަދުވެސް އުޅެނީ ކުޑަކުއްޖަކު ހައްދަން އުޅޭހެން،ޤާސިމް އުފާކޮށް ޚުޝާމަދުކޮށް ގޯނީފުލަށް ލާންވެގެން.ވަރަށްދެރަކަމެއްތިކުރަނީ.ތިހެންއުޅެގެން ޤާސިމަށް ހުރިހާ ދެރައެއްލިބެނީ.ޤާސިމަށްވެސް މިކަން ރޭކާވެސްނުލާކަން ހިތާމައަކީ..ތިހުރިހާ ބޭފުޅުންނަށް ސަލާމް!
ވެރިކަންކުރަން ގާސިމް ހުންނާނީ ސަންއައލެންޑްގެ ބަދިގޭ ބޮޑު ކައްކާގެ ހެދުމުގަ ސަނއައިލޭންޑް ބަދިގޭގަ.